பாடசாலையொன்றில் கத்திக்குத்து..........!

          

பாடசாலையொன்றில் கத்திக்குத்து..........! 

பாடசாலையொன்றில் கத்திக்குத்து..........!  

எப்பாவலை பகுதியில் பாடசாலையொன்றில், 12 ஆம் தர மாணவர் ஒருவர் நடத்திய கத்திக்குத்துத் தாக்குதலில் அதே பாடசாலையைச் சேர்ந்த ஐந்து மாணவர்கள் காயமடைந்துள்ளனர்.

காயமடைந்த ஐந்து மாணவர்களும் அதே பாடசாலையில் தொழில்நுட்பப் பிரிவில் 12 ஆம் தரத்தில் கல்வி கற்பவர்கள் எனவும், தாக்குதலை நடத்திய மாணவன் அதே பாடசாலையின் விஞ்ஞானப் பிரிவில் கல்வி பயிலும் 12 ஆம் தர மாணவர் எனப் பொலிஸார் தெரிவித்துள்ளனர்.

தாக்குதலை நடத்திய மாணவருக்கும், காயமடைந்தவர்களில் ஒருவருக்கும் இடையே சில நாட்களுக்கு முன்னர் ஏற்பட்ட தகராறே இந்த மோதலுக்குக் காரணம் எனத் தெரிவிக்கப்படுகின்றது.

பழிவாங்கும் நோக்கில் குறித்த மாணவன் மறைத்து வைத்திருந்த கூரிய ஆயுதத்தால் ஒருவரைத் தாக்க முயன்றபோது, அதனைத் தடுக்க முற்பட்ட ஏனைய நான்கு மாணவர்களும் காயமடைந்துள்ளனர்.

காயமடைந்த ஐந்து மாணவர்களும் எப்பாவல பிரதேச வைத்தியசாலையில் அனுமதிக்கப்பட்டுள்ளனர்.அவர்களின் உடல்நிலை கவலைக்கிடமாக இல்லை என வைத்தியசாலை வட்டாரங்கள் உறுதிப்படுத்தியுள்ளன.

தாக்குதல் நடத்திய மாணவனை எப்பாவல பொலிஸார் கைது செய்துள்ளனர். தாக்குதலுக்குப் பயன்படுத்தப்பட்ட ஆயுதமும் பொலிஸாரால் கைப்பற்றப்பட்டுள்ளது. இச்சம்பவம் குறித்து எப்பாவலலை பொலிஸார் மேலதிக விசாரணைகளில் ஈடுபட்டு வருகின்றனர்.

நடத்துனர் ஒருவர் பெண் பயணி ஒருவருக்கு  ---  பாலியல் தொல்லை

தனியார் பேருந்து ஒன்றில், பெண் பயணி ஒருவருக்குப் பாலியல் தொல்லை கொடுத்த நடத்துனர் ஒருவரை, மொனராகலை பொலிஸார் கடந்த (13) ஆம் திகதி கைது செய்துள்ளனர்.

மொனராகலையிலிருந்து பிபிலை நோக்கிச் சென்ற இந்தப் பேருந்தில் பயணித்த 26 வயதுடைய பெண் ஒருவர், பேருந்துக்குள் நின்றுகொண்டு பயணித்துள்ளார். 

அந்தச் சமயத்தில், நடத்துனர் அவருக்குப் பாலியல் ரீதியான தொல்லைகளைக் கொடுத்ததாகக் கூறப்படுகிறது. பாதிக்கப்பட்ட பெண் வீட்டிற்குச் சென்றதும் இது குறித்துத் தனது கணவரிடம் தெரிவித்துள்ளார். 

அதன் பின்னர், அவர் மொனராகலை மாவட்ட பொது வைத்தியசாலையில் அனுமதிக்கப்பட்டதுடன், அங்குள்ள வைத்தியசாலை பொலிஸாரிடம் முறைப்பாடு அளித்துள்ளார்.

இதனையடுத்து உடனடியாகச் செயற்பட்ட மொனராகலை பொலிஸார், மொனராகலை சிறிங்கல கீழ் பகுதி, தமிழ் கிராமத்தைச் சேர்ந்த 34 வயதுடைய சந்தேக நபரைக் கைது செய்துள்ளனர். 

சந்தேக நபரை மொனராகலை நீதவான் நீதிமன்றத்தில் முன்னிலைப்படுத்த நடவடிக்கை எடுக்கப்பட்டிருந்தது.

மொனராகலை தலைமையக பொலிஸ் பரிசோதகர் சமிந்த சில்வாவின் அறிவுறுத்தலின் பேரில், மகளிர் பணியகத்தின் பிரதான பொலிஸ் பரிசோதகர் பத்ராணி கமகே மேலதிக விசாரணைகளை மேற்கொண்டு வருகிறார்.

கண்டியில் வங்கி ஊழியர்களின் விபரீத கைவரிசை..! 

வங்கியின் மீது வைத்த நம்பிக்கையைச் சிதறடித்த ஒரு அதிர்ச்சி சம்பவம் இப்போது வெளிச்சத்திற்கு வந்துள்ளது. கண்டியில் உள்ள பிரபல தனியார் வங்கியில் வாடிக்கையாளர்களுக்குத் தெரியாமலேயே அவர்கள் பெயரில் பல கோடி ரூபாய் மோசடி செய்யப்பட்டுள்ளது.

நடந்தது என்ன?

மாஸ்டர் பிளான் - வங்கியின் ரகசிய ஆவணங்களை லாவகமாகப் பயன்படுத்திய 7 ஊழியர்கள், வாடிக்கையாளர்கள் பெயரில் போலி ஆவணங்களைத் தயாரித்து கடன்களைப் பெற்றுள்ளனர்.

சிக்கியது எப்படி?

வங்கியின் உள்ளக தணிக்கையில் இந்தத் தில்லுமுல்லு கண்டுபிடிக்கப்பட, உடனடியாக பொலிஸார் களமிறங்கினர். அதிரடி கைது -  கண்டி குற்றத்தடுப்புப் பிரிவினர் நடத்திய அதிரடி வேட்டையில், வங்கி அதிகாரிகள் உட்பட 7 பேர் கையும் களவுமாக கைது செய்யப்பட்டுள்ளனர். 

வங்கியில் பணம் வைத்திருக்கும் வாடிக்கையாளர்களே. உங்கள் கணக்குகளை ஒருமுறை சரிபார்த்துக் கொள்வது நல்லது.  நீதிமன்றத்தில் ஆஜர்ப்படுத்தப்பட்டுள்ள இந்த மோசடி கும்பலின் பின்னணியில் இன்னும் யாரெல்லாம் இருக்கிறார்கள் என்பது குறித்து தீவிர விசாரணை தொடர்கிறது.

வருமான வரி அலுவலக ஊழியர் கைது..! 

காணி ஒன்றின் மதிப்பீட்டு அறிக்கையை குறைந்த பெறுமதியில் தயாரித்துக் கொடுப்பதற்காக 35,000 ரூபா இலஞ்சம் பெற்ற பொலன்னறுவை மாகாண வருமான வரி, மாவட்ட அலுவலகத்தின் சுகாதாரத் தொழிலாளி ஒருவர்,  இலஞ்ச ஊழல் விசாரணை ஆணைக்குழுவின் அதிகாரிகளால் இன்று (13) கைது செய்யப்பட்டுள்ளார்.

பொலன்னறுவை பகுதியைச் சேர்ந்த ஒருவர் வழங்கிய முறைப்பாட்டிற்கு அமைய இந்தச் சோதனை நடவடிக்கை முன்னெடுக்கப்பட்டது. முறைப்பாட்டாளரின் உறவினர் ஒருவருக்குச் சொந்தமான அரச காணியை, முறைப்பாட்டாளரின் பெயருக்கு மாற்றி உறுதிப்பத்திரம் தயாரிக்கும்போது, குறித்த காணியின் மதிப்பீட்டுப் பெறுமதியை குறைத்துக் குறிப்பிடுவதாக சந்தேகநபர் வாக்குறுதியளித்துள்ளார்.

இதன் மூலம் அரசாங்கத்திற்குச் செலுத்த வேண்டிய முத்திரை வரித் தொகையைக் குறைத்துக் கொடுப்பதற்காக அவர் ஆரம்பத்தில் 50,000 ரூபாய் இலஞ்சம் கோரியுள்ளார். பின்னர் இருதரப்புக்கும் இடையே ஏற்பட்ட இணக்கப்பாட்டின் அடிப்படையில், இலஞ்சத் தொகை 35,000 ரூபாவாகக் குறைக்கப்பட்டுள்ளது.

இன்று முற்பகல் 9.27 மணியளவில் பொலன்னறுவை மாகாண வருமான வரி, மாவட்ட அலுவலக வளாகத்தில் வைத்து, குறித்த இலஞ்சப் பணத்தைப் பெற்றுக்கொண்ட போதே சந்தேகநபர் கைது செய்யப்பட்டார்.

இவ்வாறு கைது செய்யப்பட்டவர் அந்த அலுவலகத்தில் பணியாற்றும் எதிரிவீர ஆருகட்டு படபெந்திகே சுமித் இந்திக குமார என அடையாளம் காணப்பட்டுள்ளார்.

கைது செய்யப்பட்ட சந்தேகநபர் பொலன்னறுவை நீதவான் நீதிமன்றத்தில் முன்னிலைப்படுத்தப்படவுள்ளதுடன், இலஞ்ச ஊழல் விசாரணை ஆணைக்குழுவின் அதிகாரிகள் மேலதிக விசாரணைகளை மேற்கொண்டு வருகின்றனர்.

 6.6 மில்லியன் அமெரிக்க டொலர் மீட்பு..!

ஆசிய நாடு ஒன்றிலிருந்து சைபர் குற்றவாளிகளால் திருடப்பட்டதாக சந்தேகிக்கப்படும் 6.6 மில்லியன் அமெரிக்க டொலர் பணத்தை ஓமான் அரச பொலிஸார் மீட்டுள்ளதாக சர்வதேச ஊடகங்கள் செய்தி வெளியிட்டுள்ளன.

இந்தத் தொகையை ஓமானில் உள்ள வங்கி ஒன்றின் ஊடாக அந்நாட்டு நாணயத்திற்கு மாற்ற முயன்றபோது, ஓமான் அரச பொலிஸார் அதனைத் தடுத்து நிறுத்தியுள்ளனர். 

சர்வதேச பொலிஸாரின் உதவியுடன் முன்னெடுக்கப்பட்ட விசேட நடவடிக்கையின் மூலமே இந்தப் பணம் கைப்பற்றப்பட்டுள்ளது. சைபர் குற்றவாளிகளால் இந்தப் பணம் எந்த ஆசிய நாட்டிலிருந்து திருடப்பட்டது என்பது இதுவரை அதிகாரப்பூர்வமாக வெளிப்படுத்தப்படவில்லை.

எவ்வாறாயினும், அண்மையில் இலங்கையின் திறைசேரியிலிருந்து 2.5 மில்லியன் டொலர்களும்,  தபால் திணைக்களத்திலிருந்து 625,000 டொலர்களும் திருடப்பட்டதாக தகவல்கள் வெளியாகியிருந்தன. 

இதனால், ஓமானில் மீட்கப்பட்ட பணத்திற்கும் இலங்கையில் காணாமல் போன பணத்திற்கும் ஏதேனும் தொடர்பு இருக்கிறதா என்பது குறித்து தற்போது அதிக கவனம் செலுத்தப்பட்டு வருகிறது.

இலங்கையைத் தவிர வேறு எந்த ஆசிய நாட்டிலிருந்தும் அண்மைக் காலத்தில் இவ்வளவு பெரிய அளவிலான பணம் காணாமல் போனதாக தகவல்கள் எதுவும் வெளியாகவில்லை என்பது குறிப்பிடத்தக்கது.

உலக சந்தையில் எரிபொருள் விலை அதிகரிப்பு

மத்திய கிழக்கு பிராந்தியத்தில் நிலவும் போர்ச் சூழல் காரணமாக உலக சந்தையில் எரிபொருள் விலை கணிசமாக உயர்ந்துள்ளதாகவும், இதற்கமைய ஒரு லீட்டர் டீசலின் அடக்கவிலை 720 ரூபா வரை அதிகரித்துள்ளதாகவும் ஜனாதிபதி அணுர குமார திஸாநாயக்க தெரிவித்தார்.

நுவரெலியா மாவட்ட விசேட ஒருங்கிணைப்புக் குழுக் கூட்டத்தில் கலந்துகொண்டு உரையாற்றும் போதே ஜனாதிபதி இதனைக் குறிப்பிட்டார்.

முக்கிய விடயங்கள்:

 எரிபொருள் மானியம்: உலக சந்தையில் விலை அதிகரித்துள்ள போதிலும், அரசாங்கம் தற்போது ஒரு லீட்டர் டீசலை 392 ரூபா என்ற சலுகை விலையில் மக்களுக்கு வழங்கி வருவதுடன், இதற்காக ஒரு லீட்டருக்கு 100 ரூபா நேரடி மானியத்தை அரசாங்கம் சுமப்பதாக ஜனாதிபதி வலியுறுத்தினார்.

 பொருளாதார சவால்கள்: எரிபொருள் இறக்குமதிக்காக செலவிடப்படும் வெளிநாட்டு அந்நியச் செலாவணி அளவு வேகமாக அதிகரித்துள்ளதை அவர் புள்ளிவிபரங்களுடன் சுட்டிக்காட்டினார்.

 செலவு அதிகரிப்பு: பெப்ரவரி மாதத்தில் எரிபொருள் இறக்குமதிக்காக செலவிடப்பட்ட 98 மில்லியன் அமெரிக்க டொலர்கள், மே மாதமாகும் போது சுமார் ஆறு மடங்கு அதிகரித்து 522 மில்லியன் டொலர்களாக உயரும் என மதிப்பிடப்பட்டுள்ளது.

 நிதி ஒழுக்கம்: இவ்வாறான சூழ்நிலையில் வலுவான நிதி ஒழுக்கத்தைப் பேணுவது அவசியம் என்றும், கடந்த காலத்தைப் போல திறைசேரிக்கு சுமையாகும் வகையில் எரிபொருள் கூட்டுத்தாபனம் மற்றும் மின்சார சபை என்பன நட்டமடைய இடமளிக்க முடியாது என்றும் அவர் குறிப்பிட்டார்.

 பயன்பாட்டு கட்டுப்பாடு: நாட்டிலிருந்து வெளியேறும் அந்நியச் செலாவணியைக் கட்டுப்படுத்துவதற்காக, எரிபொருள் நுகர்வினை ஒரு குறிப்பிட்ட மட்டத்திற்கு மட்டுப்படுத்த வேண்டிய தேவை உள்ளதாகவும் ஜனாதிபதி சுட்டிக்காட்டினார்.

 மின்சாரக் கட்டணம்: மக்களுக்கு தேவையற்ற சுமையை சுமத்துவதை தவிர்ப்பதற்கு அரசாங்கம் அதிகபட்ச முயற்சி எடுத்து வருவதாகக் குறிப்பிட்ட அவர், மின்சாரக் கட்டணத்தை உயர்த்தும் போது கூட, பெரும்பான்மையான மக்களைப் பாதிக்காத வகையில் வெறும் 5 சதவீதத்தினருக்கு மாத்திரம் பாதிப்பு ஏற்படும் வகையில் நடவடிக்கை எடுத்ததாக மேலும் தெரிவித்தார்.

பாடசாலையொன்றில் கத்திக்குத்து..........!