மக்களுக்கு விடுக்கப்பட்டுள்ள அவசர எச்சரிக்கை...

மக்களுக்கு விடுக்கப்பட்டுள்ள அவசர எச்சரிக்கை...

மக்களுக்கு விடுக்கப்பட்டுள்ள அவசர எச்சரிக்கை...

            வெசாக் பண்டிகைக் காலத்தில் தங்க நகைகள், பணம் உள்ளிட்ட பெறுமதியான சொத்துக்கள் வைத்திருப்போர் கூடுதல் கவனத்துடன் செயற்படுமாறு பொலிஸார் பொதுமக்களுக்கு அறிவுறுத்தியுள்ளனர்.

தங்களது தங்க நகைகள் உள்ளிட்ட தங்களது மதிப்புமிக்க பொருட்களைத் திருடர்களிடமிருந்து பாதுகாக்குமாறும் எச்சரிக்கை விடுக்கப்பட்டுள்ளது.

வெசாக் பண்டிகைக்காலத்தில், பொது அமைதிக்கு குந்தகம் விளைவிக்காமல் சமய நடவடிக்கைகள் நடைபெறுவதை உறுதிசெய்ய, சில சிறப்பு அம்சங்களைக் கவனத்தில் கொள்ளுமாறு பொலிஸார் பொதுமக்களை கேட்டுக்கொண்டுள்ளனர்.

நடனம் ஆடுவதையும், முகக்கவசம் அணிவதையும், விசித்திரமான முறையில் நடந்துகொள்வதையும், பொது இடங்களில் பிறருக்கு இடையூறு விளைவிக்கும் மற்றும் துன்புறுத்தும் வகையில் உரத்த இசை வாத்தியங்களை தவிர்க்குமாறும், கோயில்கள் மற்றும் பந்தல்களுக்கு அருகில் திருவிழாவிற்குப் பொருத்தமற்ற உரத்த இசையையோ அல்லது பாடல்களையோ இசைப்பதையும் தவிர்க்குமாறும் அறிவுறுத்தியுள்ளது.

மேலும், ஒலிபெருக்கிகளைக்கொண்டு பிறருக்கு இடையூறு விளைவிக்காத வகையில் நடந்துகொள்ளுமாறும், அத்தகைய நடவடிக்கைகளை மேற்கொள்ள சட்ட நடைமுறையின்படி அனுமதி பெறுமாறும் பொலிஸார் பொதுமக்களுக்கு அறிவுறுத்தியுள்ளனர்.

வெசாக் பண்டிகைக் காலத்தில் கோயில்கள், வெசாக் பந்தல்கள், விளக்குக் கண்காட்சிகள், பக்திப் பாடல் நிகழ்ச்சிகள் மற்றும் தானசாலைகளில் போக்குவரத்து நெரிசலைக் குறைப்பதற்கான அவசியமான நடவடிக்கைகளை மேற்கொள்ளுமாறு அறிவுறுத்தப்பட்டுள்ளது.

கட்டுநாயக்க – மினுவாங்கொட வீதி முற்றாக மூடப்பட்டது!

கட்டுநாயக்க – மினுவாங்கொட வீதி முற்றாக தடைப்பட்டுள்ளதாக பொலிஸ் ஊடகப் பிரிவு அறிவித்துள்ளது தற்போது நிலவும் மோசமான வானிலை காரணமாக ஏற்பட்ட வெள்ளப்பெருக்கு காரணமாக நைகந்த பகுதியிலிருந்து வாகனங்கள் செல்கின்றன.

இதன் விளைவாக, ஓட்டுநர்களும் வீதியைப் பயன்படுத்தும் பொதுமக்களும் மாற்று வழிகளைப் பயன்படுத்துமாறு பொலிஸார் கேட்டுக்கொண்டுள்ளனர்.

அதன்படி, கொழும்பிலிருந்து அதிவேக நெடுஞ்சாலை வழியாக கட்டுநாயக்க வழியே குருநாகல் அதிவேக நெடுஞ்சாலைக்குச் செல்ல விரும்பும் வாகனங்கள், ஜா-எல மற்றும் மினுவாங்கொட வழியாக மாற்று வழியில் பயணிக்கலாம்.

மேலும், குருநாகல் அதிவேக நெடுஞ்சாலையிலிருந்து கட்டுநாயக்க வழியாக கொழும்புக்கு வரும் வாகனங்களும் மினுவாங்கொட மற்றும் ஜா-எல வழியாகப் பயணிக்கலாம் என்று அந்த அறிக்கையில் கூறப்பட்டுள்ளது.

கூடுதலாக, கம்பஹா பகுதியிலிருந்து வரும் வாகனங்கள், மினுவாங்கொட-ஜா-எல சாலை வழியாக மினுவாங்கொட மற்றும் சீதுவ வழியாக மாற்று வழியில் பயணிக்கலாம் என்று காவல்துறை ஊடகப் பிரிவு மேலும் தெரிவிக்கிறது.

டிக்கோயா இரட்டைக் கொலை.. சந்தேக நபர் அதிரடி கைது.

டிக்கோயா நகர் பகுதியில் வர்த்தக நிலையமொன்றில் நடந்த இரட்டைக் கொலை சம்பவத்தில் முக்கிய சந்தேக நபர் கைது செய்யப்பட்டுள்ளதாக ஹட்டன் சிரேஷ்ட காவல் கண்காணிப்பாளர் பிரதீப் வீரசேகர தெரிவித்தார்.

குறித்த நபர், பொகவந்தலாவை - பெற்றசோ பகுதியில் ஒரு வீட்டில் பதுங்கி இருந்த கைது செய்யப்பட்டதாக தெரிவிக்கப்படுகின்றது.

ஹட்டன் பொலிஸாருக்கு கிடைத்த இரகசிய தகவலையொட்டி இந்த கைது நடவடிக்கை முன்னெடுக்கப்பட்டுள்ளதாக தெரிவிக்கப்படுகின்றது. 

மேலும், சந்தேக நபரிடம் இருந்து தங்க நகைகளும் கைப்பற்றப்பட்டுள்ளதாகவும் பொலிஸார் தெரிவித்தனர் 

இந்நிலையில், சந்தேக நபர் விசாரணைக்காக ஹட்டன் மத்திய பொலிஸ் நிலையத்திற்கு அழைத்து வரப்படவுள்ளனர்.

எதிர்வரும் காலத்தில் ஒரு லீற்றர் டீசலின் விலை ரூ.150 வரை அதிகரிக்கக்கூடும்

எதிர்க்கட்சியின் நாடாளுமன்ற உறுப்பினர் எஸ்.எம். மரிக்கார், எதிர்வரும் காலத்தில் ஒரு லீற்றர் டீசலின் விலை ரூ.150 வரை அதிகரிக்கக்கூடும் என எச்சரிக்கை விடுத்துள்ளார்.

பொது கூட்டமொன்றில் உரையாற்றிய அவர், மக்களுக்கு நிவாரணம் வழங்குவதாக வாக்குறுதி அளித்து அரசாங்கம் ஆட்சிக்கு வந்ததாக தெரிவித்தார். 

மின்சார கட்டணம் குறைப்பு, வரி குறைப்பு மற்றும் அத்தியாவசிய பொருட்களின் விலை குறைப்பு போன்ற வாக்குறுதிகள் வழங்கப்பட்டதாகவும் கூறினார்.

ஆனால், தற்போதைய ஆட்சியில் மின்சார கட்டணம் அதிகரித்துள்ளதாகவும், நீர் கட்டணம் மற்றும் எரிபொருள் விலைகளும் மேலும் உயரக்கூடும் என்றும் அவர் குற்றஞ்சாட்டினார்.

ரூபாயின் பெறுமதி வீழ்ச்சி மற்றும் எரிபொருள் விலை உயர்வு காரணமாக, இறக்குமதி பொருட்கள், மருந்துகள், உணவுப் பொருட்கள் மற்றும் விவசாய உற்பத்தி செலவுகள் ஆகியவற்றின் விலைகள் அடுத்த சில வாரங்களில் அதிகரிக்கும் எனவும் மரிக்கார் தெரிவித்துள்ளார்.

மேலும், ஜனாதிபதி அனுரகுமார திஸாநாயக்க பதவியேற்றதிலிருந்து அமெரிக்க டொலரின் பெறுமதி ரூ.292 இலிருந்து ரூ.336 ஆக உயர்ந்துள்ளதாகவும், 

இதனால் நாட்டின் கடன் சுமை அதிகரித்துள்ளதாகவும் அவர் கூறினார்.

எரிசக்தி துறையின் மேலாண்மையை விமர்சித்த மரிக்கார், நிலக்கரி இறக்குமதி மற்றும் தனியார் மின் கொள்முதல் செலவுகள் தொடர்பாக அரசாங்கம் இழப்புகளை சந்தித்துள்ளதாகவும் குற்றஞ்சாட்டினார்.

சர்வதேச நாணய நிதியத்தின் (IMF) ஆதரவை அதிகமாக நம்பி அரசாங்கம் செயல்படுவதாகவும், 

அதன் பொருளாதார அழுத்தம் இறுதியில் மக்கள்மீதே அதிக விலைகள் மற்றும் வரிகளாக சுமத்தப்படும் என்றும் அவர் எச்சரித்தார்.

6 மாவட்டங்களுக்கு மண்சரிவு சிவப்பு எச்சரிக்கை விடுப்பு...

    நாட்டில் நிலவும் சீரற்ற காலநிலைக் காரணமாக 6 மாவட்டங்களுக்கு மண்சரிவு முன்னெச்சரிக்கையை தேசிய கட்டிட ஆராய்ச்சி நிறுவனம் விடுத்துள்ளது. 

இதற்கமைய, கேகாலை மாவட்டத்தின் தெரனியாகலை, ருவன்வெல்ல, தெஹியோவிட்ட மற்றும் இரத்தினபுரி மாவட்டத்தின் எஹலியகொட, குருவிட்ட, அயகம, இரத்தினபுரி ஆகிய பகுதிகளுக்கு வெளியேறுவதற்கான 'சிவப்பு எச்சரிக்கை விடுக்கப்பட்டுள்ளது. 

அத்துடன், கொழும்பு மாவட்டத்தின் சீதாவக்க மற்றும் பாதுக்கை பகுதிகளுக்கும், கம்பஹா மாவட்டத்தின் அத்தனகல்ல பகுதிக்கும், களுத்துறை மாவட்டத்தின் புளத்சிங்கள, ஹொரணை, இங்கிரிய, பாலிந்தநுவர ஆகிய பகுதிகளுக்கும், கேகாலை மாவட்டத்தின் யட்டியாந்தோட்டை பகுதிக்கும், இரத்தினபுரி மாவட்டத்தின் பெல்மதுல்ல, கிரியெல்ல, எலபாத, கலவனை, நிவித்திகல ஆகிய பகுதிகளுக்கும் இரண்டாம் கட்ட மண்சரிவு எச்சரிக்கை விடுக்கப்பட்டுள்ளது. 

இதேவேளை, கம்பஹா மாவட்டத்தில் மீரிகம மற்றும் திவுலபிட்டிய, களுத்துறை மாவட்டத்தில் அகலவத்த மற்றும் மத்துகம, கேகாலை மாவட்டத்தில் புலத்கொஹுபிட்டிய, நுவரெலியா மாவட்டத்தில் அம்பகமுவ ஆகிய பகுதிக்கும் முதலாம் கட்ட மண்சரிவு எச்சரிக்கை விடுக்கப்பட்டுள்ளமை குறிப்பிடத்தக்கது.

சீரற்ற காலநிலை  காரணமாக 7,700க்கும் மேற்பட்டோர் பாதிப்பு...

    நாட்டில் ஏற்பட்டுள்ள சீரற்ற காலநிலையால், இரத்தினபுரி, கம்பஹா, களுத்துறை மற்றும் காலி மாவட்டங்களில் உள்ள 1,966 குடும்பங்களைச் சேர்ந்த 7,757 பேர் பாதிக்கப்பட்டுள்ளனர்.

58 குடும்பங்களைச் சேர்ந்த 201 பேர் 6 பாதுகாப்பான இடங்களில் தங்க வைக்கப்பட்டுள்ளனர்.

காலை (23) முடிவடைந்த 24 மணி நேரத்தில், கம்பஹா மாவட்டத்தின் அலவல பகுதியில் அதிகபட்சமாக 137.8 மில்லிமீற்றர் மழை பதிவாகியுள்ளது.

மேலும், இரத்தினபுரி மாவட்டத்தின் எஹெலியகொடவில் 117.4 மில்லிமீற்றர் மழை பெய்துள்ளது.

இதன் காரணமாக, குறித்த பகுதியிலிருந்து 12 குடும்பங்கள் வெளியேற்றப்பட்டுள்ளதாக இரத்தினபுரி மாவட்ட அனர்த்த முகாமைத்துவ நிலைய அலுவலகம் தெரிவித்துள்ளது.

களுகங்கை தாழ்நிலப் பகுதிகளுக்கு வெள்ள எச்சரிக்கை...

களுகங்கையின் ஆற்றுப்படுகைப் பகுதிகளில் பதிவான கடும் மழைவீழ்ச்சியால், அதன் தாழ்நிலப் பகுதிகளில் சிறியளவிலான வெள்ள நிலைமை ஏற்படக்கூடும் என நீர்ப்பாசன திணைக்களம் எச்சரிக்கை விடுத்துள்ளது.

இன்று முற்பகல் 8.30 மணி முதல் அடுத்த 24 மணித்தியாலங்களுக்கு அமுலில் இருக்கும் வகையில் இந்த எச்சரிக்கை வெளியிடப்பட்டுள்ளதாக தெரிவிக்கப்பட்டுள்ளது.

இதன்படி, களுத்துறை மாவட்டத்தின் இங்கிரிய, ஹொரணை, தொடங்கொட, மில்லனிய, களுத்துறை, புளத்சிங்கள, மதுராவல மற்றும் பாலிந்தநுவர பிரதேச செயலாளர் பிரிவுகளின் தாழ்நிலப் பகுதிகளில் வெள்ள அபாயம் காணப்படுவதாக அறிவிக்கப்பட்டுள்ளது.

இலங்கையில் உயிர்மாய்ப்பு மரணங்கள் 70% குறைவு – அமைச்சர் நலிந்த ஜெயதிஸ்ஸ...

    1990இல் அதிக நச்சுத்தன்மை கொண்ட பூச்சிக்கொல்லிகளுக்கு உகந்த முறையில் தடை விதிக்கப்பட்டதிலிருந்து இலங்கையின் உயிர்மாய்ப்பு மரணங்களின் விகிதம் சுமார் 70% குறைந்துள்ளது என்று சுகாதார மற்றும் வெகுஜன ஊடக அமைச்சர் டாக்டர் நலிந்த ஜெயதிஸ்ஸ தெரிவித்துள்ளார். 

மேலும், அனைத்து நாடுகளும் தங்களின் உயிர்மாய்ப்பு தடுப்பு உத்திகளில் பூச்சிக்கொல்லி கட்டுப்பாடுகளைச் சேர்க்க வேண்டும் என்றும் அவர் முன்மொழிந்தார்.

சுவிட்சர்லாந்தின் ஜெனீவாவில் நடைபெற்ற உலக சுகாதார அமைப்பின் 79ஆவது உலக சுகாதார மாநாட்டின் ஒரு பகுதியாக, “பூச்சிக்கொல்லிகளால் ஏற்படும் உயிர்மாய்ப்புகளைத் தடுத்தல்” என்ற தலைப்பிலான சிறப்பு அமர்வில் பங்கேற்றபோது அமைச்சர் இந்தக் கருத்துக்களைத் தெரிவித்தார்.

16ஆம் திகதி தொடங்கிய 79ஆவது உலக சுகாதாரப் பேரவை, நாளை (23) வரை தொடரும். இதில், 194 நாடுகளைச் சேர்ந்த சுகாதார அமைச்சர்கள், தூதுவர்கள், பல்வேறு நிறுவனங்களின் பிரதிநிதிகள் மற்றும் பார்வையாளர்கள் உட்பட ஏராளமானோர் பங்கேற்றுள்ளனர்.

இந்த அமர்வை இலங்கை, கயானா, கென்யா, நைஜீரியா மற்றும் பாகிஸ்தான் ஆகிய நாடுகள் கூட்டாக ஏற்பாடு செய்திருந்தன. மேலும், உலக சுகாதார அமைப்பு, ஐக்கிய நாடுகள் சுற்றுச்சூழல் திட்டம் மற்றும் உயிர்மாய்ப்பு மரணங்களை தடுப்புக்கான சர்வதேச சங்கம் ஆகியவையும் இதற்கு அனுசரணை வழங்குகின்றன.

1990ஆம் ஆண்டு முதல், அதிக நச்சுத்தன்மை கொண்ட பூச்சிக்கொல்லிகளை உகந்த முறையில் தடை செய்ததன் மூலம் நாட்டில் உயிர்மாய்ப்புள் சுமார் 70% குறைந்துள்ளதாகவும், இதுவே சிறந்த ஆதார அடிப்படையிலான சிறந்த விடயம் என்றும் அவர் குறிப்பிட்டுள்ளார். 

மேலும், குறைந்த செலவில் குறுகிய காலத்தில் பலன்களை அளிக்கக்கூடிய வகையில் அனைத்து நாடுகளும் தங்களின் உயிர்மாய்ப்பு தடுப்பு உத்திகளில் பூச்சிக்கொல்லி கட்டுப்பாட்டைச் சேர்க்க வேண்டும் என்று தாம் முன்மொழிவதாக அமைச்சர் தனது கருத்துக்களைத் இதன்போது தெரிவித்துள்ளார். 

இந்தப் பணிகளுக்காக வளர்ந்து வரும் நாடுகளுக்கு தொழில்நுட்ப மற்றும் கொள்கை ரீதியான ஆதரவை வழங்குவது உலக சுகாதார அமைப்பு மற்றும் ஐக்கிய நாடுகள் சுற்றுச்சூழல் திட்டம் போன்ற அமைப்புகளுக்கு இன்றியமையாதது என்றும், இலங்கை தனது அனுபவங்களை மற்ற நாடுகளுடன் பகிர்ந்து கொள்ள எப்போதும் தயாராக உள்ளது என்றும் அமைச்சர் குறிப்பிட்டுள்ளார். 

மேலும், உயிர்மாய்ப்பு மரணங்களை தடுக்க பூச்சிக்கொல்லிகளைக் கட்டுப்படுத்துவது மட்டும் போதாது என்றும், சமூக அடிப்படையிலான சுகாதார சேவைகள் வலுப்படுத்தப்பட வேண்டும் என்றும், இலங்கை தற்போது ஆரம்ப சுகாதாரப் சேவையை வலுப்படுத்துவதன் மூலம் இதைச் செய்து வருகின்றது என்றும் அவர் கூறினார்.

பூச்சிக்கொல்லி கட்டுப்பாட்டுக் கொள்கையை உலக சுகாதார அமைப்பின் (WHO) வழிகாட்டுதல்களில் சேர்ப்பதும், உறுப்பு நாடுகளைத் தங்கள் தேசியத் திட்டங்களில் அதைச் சேர்க்க ஊக்குவிப்பதும் இந்த அமர்வின் முக்கிய நோக்கமாகும்.

உயிர்மாய்ப்புகளைக் குறைப்பதில் இலங்கை தற்போது உலக அளவில் முன்னணியிலுள்ளது. 1995-ல் ஒரு இலட்சத்திற்கு 47 ஆக இருந்த உயிர்மாய்ப்பு விகிதம், 2022-க்குள் 14 ஆகக் குறைந்துள்ளது. 

நச்சுப் பூச்சிக்கொல்லிகள் மீதான தடையே இதற்குக் முக்கியக் காரணம் என்று இங்கு தெரியவந்துள்ளது. இதற்கிடையில், உயிர்மாய்ப்புகளை தடுப்புக்கான சர்வதேச சங்கம் (IASP) தனது 34ஆவது உயிர்மாய்ப்புகளை தடுப்பு உலக மாநாட்டை 2027இல் இலங்கையில் நடத்தத் திட்டமிட்டுள்ளதாகவும் இங்கு குறிப்பிடப்பட்டது.

மக்களுக்கு விடுக்கப்பட்டுள்ள அவசர எச்சரிக்கை...