பாடசாலை நேரம் மாற்ற...

  பாடசாலை நேரம் மாற்ற...

 

  பாடசாலை நேரம் மாற்ற...

அரசாங்கம் எந்தவொரு அரச பாடசாலையையும் தன்னிச்சையாக மூடுவதற்கு நடவடிக்கை எடுக்கவில்லை என்றும், மாணவர் எண்ணிக்கை குறைவாக உள்ள பாடசாலைகள் குறித்து அறிவியல் பூர்வமான ஆய்வுகள் மட்டுமே மேற்கொள்ளப்பட்டு வருவதாகவும் அமைச்சரவைப் பேச்சாளர் அமைச்சர் நளிந்த ஜயதிஸ்ஸ தெரிவித்துள்ளார்.

 

அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில், பாடசாலைகளை மூடுவது, கல்வி மறுசீரமைப்புகள் மற்றும் பாடசாலை நேர மாற்றம் குறித்து எழுப்பப்பட்ட கேள்விகளுக்குப் பதிலளிக்கையிலேயே அவர் இதனைத் தெளிவுபடுத்தினார்.

 

எந்தவொரு பாடசாலையையும் உடனடியாக மூடும் எண்ணம் அரசாங்கத்திற்கு இல்லை என்றும், கடந்த பல வருடங்களாக மாணவர்களின் எண்ணிக்கை தொடர்ச்சியாகக் குறைந்து வரும் பாடசாலைகள் தொடர்பிலேயே கவனம் செலுத்தப்பட்டு வருவதாகவும் அமைச்சர் சுட்டிக்காட்டினார்.

 

60 அல்லது 70 வருடங்களுக்கு முன்னர் அமைக்கப்பட்ட சில பாடசாலைகளின் அமைவிடமும், தற்போதைய மக்கள் தொகை பரம்பலும் வேறுபட்டுள்ளன.

 

மாணவர்கள் மிகக் குறைவாக உள்ள பாடசாலைகள் குறித்துக் கோட்ட மற்றும் வலய மட்டத்தில் அறிக்கைகள் கோரப்பட்டு ஆய்வுகள் முன்னெடுக்கப்பட்டு வருகின்றன.

 

பாடசாலையை வெறுமனே திறந்து வைப்பதை விட, நாட்டிலுள்ள ஒவ்வொரு பிள்ளைகளுக்கும் தரமான மற்றும் வசதிகள் நிறைந்த கல்வியை உறுதி செய்வதே அரசாங்கத்தின் பிரதான நோக்கமாகும் எனவும் அவர் குறிப்பிட்டார்.

 

அத்துடன் கல்வி அமைப்பில் நிலவும் ஆசிரியர் பற்றாக்குறைக்குத் தீர்வாக மிக விரைவில் 3,000 புதிய ஆசிரியர்களைக் கல்வி அமைப்பில் இணைத்துக் கொள்ள நடவடிக்கை எடுக்கப்பட்டு வருவதாகவும், இதன் மூலம் ஆசிரியர் பற்றாக்குறைக்குக் கணிசமான தீர்வு கிடைக்கும் என்றும் அமைச்சர் தெரிவித்தார்.

 

கல்வி மறுசீரமைப்பு என்பது பாடத்திட்டங்களை மாற்றுவதுடன் மட்டும் நின்றுவிடாமல், பாடசாலைகளுக்குத் தேவையான பௌதிக மற்றும் மனித வளங்களை வழங்குதல், கல்வி நிர்வாகக் கட்டமைப்பில் சீர்திருத்தங்களை மேற்கொள்தல் மற்றும் மதிப்பீட்டு முறைகளை நவீனமயமாக்கல் உள்ளிட்ட அனைத்துக் காரணிகளையும் உள்ளடக்கியதாகவே அமையும்.

 

இதற்கமைய, 2027 ஆம் ஆண்டளவில் 1, 2 மற்றும் 6 ஆம் தரங்களுக்கான புதிய பாடத்திட்ட மறுசீரமைப்புகள் அமுல்படுத்தப்படும் எனவும் அவர் விளக்கமளித்தார்.

 

மேலும் பாடசாலை ஆரம்பிக்கும் மற்றும் முடிவடையும் நேரத்தை மாற்றுவது தொடர்பாகத் தற்போது கல்வி அமைச்சினால் தயாரிக்கப்பட்டுள்ள அறிக்கைகள் தொடர்பில் எந்தக் கலந்துரையாடலும் இடம்பெறவில்லை என்றும், இது குறித்துக் கல்வி அமைச்சு எதிர்காலத்தில் ஏதேனும் தீர்மானம் எடுத்தால் அது முறைப்படி அறிவிக்கப்படும் என்றும் அமைச்சர் நளிந்த ஜயதிஸ்ஸ மேலும் தெரிவித்தார். 

ஒக்டோபர் 1 முதல் முதியோர் கொடுப்பனவு வங்கிக் கணக்குகளில் வைப்பு…

 

2026 செப்டம்பர் மாதத்திற்கான முதியோர் கொடுப்பனவு, ஒக்டோபர் 01 ஆம் திகதி சம்பந்தப்பட்ட பயனாளிகளின் 'அஸ்வெசும' வங்கிக் கணக்குகளில் வைப்பு செய்யப்படவுள்ளதாக நலன்புரிப் நன்மைகள் சபை தெரிவித்துள்ளது.

 

இதன்படி, அஸ்வசும நலன்புரி நன்மைகள்பெறும் திட்டத்தின் முதற்கட்டத்தின் கீழ் 70 வயதிற்கு மேற்பட்ட 616,755 முதியோர்களுக்காக 3,083.755 மில்லியன் ரூபாய் ஒதுக்கீடு செய்யப்பட்டுள்ளது.

 

மேலும், அதன் இரண்டாம் கட்டத்தின் கீழ் 70 வயதிற்கு மேற்பட்ட 79,063 முதியோர்களுக்காக 395.315 மில்லியன் ரூபாய் நிதி ஒதுக்கப்பட்டுள்ளது.

 

அதற்கமைய, இவ்விரு கட்டங்களின் கீழும் 695,818 முதியோர்களுக்காக மொத்தம் 3,479.07 மில்லியன் ரூபாய் செலுத்தப்படவுள்ளது.

 

சம்பந்தப்பட்ட பயனாளிகள் ஒக்டோபர் 01 ஆம் திகதி முதல் தங்களது முதியோர் கொடுப்பனவை அஸ்வெசும வங்கிக் கணக்குகள் ஊடாகப் பெற்றுக்கொள்ள முடியும் என நலன்புரி நன்மைகள் சபை மேலும் தெரிவித்துள்ளது.

 

 

 

நீதிமன்றத்தில்  அறிக்கை  வெளியிடப்பட்ட பின்னரே திலீபனின் உருவச்சிலை அகற்றப்பட்டது…

 

LTTE இலங்கையில் தடை செய்யப்பட்ட ஒரு இயக்கம்.அதன் கொடி, சின்னம் போன்றவற்றை காட்சிப்படுத்தவும் முடியாது. அதனால்தான் நாங்கள் தியாக திலீபனின் சிலையை அகற்றினோம்.

-அமைச்சரவை பேச்சாளர்-

 

 

 

அதிகரிக்கும் வெப்பம்…

 

வடமத்திய மாகாணம் உட்பட நாட்டின் பல பகுதிகளில் நிலவி வரும் கடும் வெப்பம் காரணமாக வீடுகளுக்குள் மக்கள் பெரும் சிரமத்தை எதிர்கொண்டு வருகின்றனர்.

 

குறிப்பாக பகல் நேரத்தில் 38-40 டிகிரி செல்சியஸ் வரை வெப்பம் பதிவாவதால்,

 

தகரக் கூரை மற்றும் சீமெந்து கூரை வீடுகளில் வசிப்பவர்களின் நிலை மிகவும் பரிதாபமாக உள்ளது.

 

மக்கள் படும் வேதனைகள்:

 

மக்கள் எதிர்நோக்கும் பிரதான பிரச்சினைகள் பின்வருமாறு:

 

தூக்கமின்மை மற்றும் உடல் சோர்வு:

 

இரவிலும் வெப்பம் குறையாததால் குழந்தைகள், முதியவர்கள் தூங்க முடியாமல் அவதிப்படுகின்றனர்.

 

தொடர்ச்சியான வியர்வையால் உடலில் நீர்ச்சத்து குறைந்து சோர்வு, தலைசுற்றல் ஏற்படுகிறது.

 

 சுகாதார பிரச்சினைகள்:

 

அதிக வியர்வை காரணமாக தோல் நோய்கள், வேர்க்குரு, சிறுநீரக பிரச்சினைகள் அதிகரித்து வருவதாக வைத்தியர்கள் எச்சரிக்கின்றனர்.

 

மின் கட்டண உயர்வு:

 

வெப்பத்தை தணிக்க மின்விசிறிகள் தொடர்ந்து இயங்குவதால், ஏழை குடும்பங்களின் மாதாந்த மின் கட்டணம் இரட்டிப்பாகியுள்ளது.

 

Air Condition பயன்படுத்த முடியாத நிலையில் மக்கள் தவிக்கின்றனர்.

 

 அன்றாட வேலைகள் பாதிப்பு: சமையலறைகளில் வெப்பம் தாங்க முடியாத அளவுக்கு உள்ளதால்,

 

பெண்கள் பகலில் சமைக்க முடியாத நிலை ஏற்பட்டுள்ளது.

 

இந்த வெப்பத்தில் இருந்து தப்பிக்க செய்யக்கூடிய எளிய தீர்வுகள்:

 

அதிக செலவில்லாமல் வீட்டை குளிர்ச்சியாக வைத்திருக்க சில வழிமுறைகளை நிபுணர்கள் பரிந்துரைக்கின்றனர்.

 

 கூரையை குளிர்ச்சியாக்குங்கள்:

 

தகரக் கூரை மீது வெள்ளை நிற பெயிண்ட் அடிப்பது அல்லது வைக்கோல், தென்னோலைகளால் மூடுவது வெப்பத்தை 5 டிகிரி வரை குறைக்கும்.

 

கூரைக்கு மேல் தண்ணீர் தெளிப்பதும் சிறந்த பலன் தரும்.

 

 இயற்கை காற்றோட்டம்:

 

பகல் 10 மணி முதல் மாலை 4 மணி வரை ஜன்னல், கதவுகளை மூடி திரைச்சீலைகளை போடுவதும்,

 

காலை மற்றும் மாலை நேரங்களில் எதிர் எதிர் ஜன்னல்களை திறந்து வைப்பதும் வீட்டை குளிர்ச்சியாக வைக்கும்.

 

 வீட்டை சுற்றி மரம் வளர்ப்பு:

 

வீட்டின் மேற்கு மற்றும் கிழக்கு பக்கங்களில் வேப்பமரம், மா மரம் போன்ற நிழல் தரும் மரங்களை நடுவது நீண்டகால தீர்வாகும்.

 

கொடி வகை செடிகளை படர விடுவதும் வெப்பத்தை தடுக்கும்.

 

தண்ணீரை அதிகம் பயன்படுத்துங்கள்:

 

வீட்டின் தரையை ஒரு நாளைக்கு இரண்டு முறை தண்ணீரால் கழுவுதல்,

 

வீட்டின் முன் முற்றத்தில் தண்ணீர் தெளித்தல், ஈரத் துணியை ஜன்னலில் தொங்கவிடுதல் போன்றவை உள்ளே குளிர்ச்சியை தரும்.

 

மின்சாரம் இல்லாமல் குளிர்ச்சி:

 

மண் பானையில் தண்ணீர் வைத்து குடிப்பது, பருத்தி ஆடைகளை அணிவது,

 

மதிய நேரத்தில் சூடான உணவுகளை தவிர்த்து நீராகாரம்,

 

இளநீர், கஞ்சி போன்றவற்றை எடுத்துக் கொள்வது உடல் வெப்பத்தை குறைக்கும்.

 

வெப்பம் இது வெறும் பருவநிலை மாற்றம் மட்டுமல்ல, நம் வாழ்வாதார பிரச்சினை.

 

அரசாங்கமும் உள்ளூர் அதிகாரிகளும் குறைந்த வருமானம் உள்ள குடும்பங்களுக்கு,

 

குளிர்ச்சியான கூரை திட்டங்களை வழங்க முன்வர வேண்டும் என பொதுமக்கள் கோரிக்கை விடுக்கின்றனர்.

 

 

 

 

அடுத்த மூன்று மாதங்களுக்கு டீசல் நிவாரணம் -  அமைச்சரவை வழங்கிய அங்கீகாரம்…

  

மத்திய கிழக்கில் நிலவும் யுத்த சூழ்நிலை காரணமாக உலக சந்தையில் எரிபொருள் விலை அதிகரித்துள்ள நிலையில், அதன் தாக்கத்தை இலங்கை மக்களுக்கு குறைக்கும் வகையில், அடுத்த மூன்று மாதங்களுக்கு ஓட்டோ டீசல் மற்றும் தொழில்துறை டீசலுக்கு (industrial diesel) நிவாரணம் வழங்க அரசாங்கம் தீர்மானித்துள்ளது.

 

இதன்படி, ஒக்டோபர், நவம்பர் மற்றும் டிசம்பர் மாதங்களுக்கு இந்த நிவாரணத்தை வழங்குவதற்குத் தேவையான நிதி ஒதுக்கீடுகளை மேற்கொள்வதற்காக ஜனாதிபதி முன்வைத்த யோசனைக்கு அமைச்சரவை அங்கீகாரம் வழங்கியுள்ளது.

 

இதற்கமைய, ஒக்டோபர் மாதத்திற்கு 1500 கோடி ரூபாயும், நவம்பர் மாதத்திற்கு 1350 கோடி ரூபாயும், டிசம்பர் மாதத்திற்கு 1215 கோடி ரூபாயும் ஒதுக்கப்படவுள்ளன.

 

அதன்படி, மூன்று மாதங்களுக்கான டீசல் நிவாரணத்திற்காக ஒதுக்கப்படும் மொத்த தொகை 4065 கோடி ரூபாய் ஆகும்.

 

சர்வதேச சந்தையில் எரிபொருள் விலை அதிகரிப்புக்கு ஏற்ப நாட்டில் எரிபொருள் விலையை உயர்த்தாமல், நுகர்வோருக்கு சுமை ஏற்படாத வகையில் எரிபொருள் விலையை நிர்வகிக்கச் செய்வதே இந்த நிவாரணத்தின் நோக்கம் என அரசாங்கம் தெரிவித்துள்ளது.

 

 

 

 

சமூக ஊடகங்களில் பகிரப்படும் சிறுவர்களின் படங்கள் குறித்து எச்சரிக்கை...

   

பேஸ்புக் மற்றும் பிற சமூக ஊடக தளங்கள் மூலம் பணம் சம்பாதிக்கக்கூடிய நடைமுறைகள் அறிமுகப்படுத்தப்பட்டதைத் தொடர்ந்து, பெற்றோர்களின் அனுமதியுடனோ அல்லது அனுமதியின்றியோ சிறுவர்களின் புகைப்படங்களையும் காணொளிகளையும் இணையத்தில் பதிவேற்றும் செயற்பாடுகள் வேகமாக அதிகரித்து வருகின்றன.

 

சிறுவர்களின் திறமைகளை வெளிப்படுத்துவதாகவும் அவர்களின் சுவாரஸ்யமான செயல்களைப் பாராட்டுவதாகவும் கூறிக்கொண்டு, பல்வேறு நபர்களும் அமைப்புகளும் இத்தகைய காணொளிகளை வணிக நோக்கங்களுக்காகப் பயன்படுத்துவது அவதானிக்கப்பட்டுள்ளது.

 

இத்தகைய காணொளிகள் மற்றும் விலொக்ஸ் மூலம் சிறுவர்களின் அன்றாட வாழ்க்கை அந்நியர்களுக்கு வெளிப்படுத்தப்படுவது அவர்களின் தனிப்பட்ட பாதுகாப்பிற்கு கடுமையான ஆபத்தை ஏற்படுத்தக்கூடும்.

 

மேலும், செயற்கை நுண்ணறிவு தொழில்நுட்பத்தைப் பயன்படுத்தி, பொருத்தமற்ற அல்லது பாலியல் ரீதியான உள்ளடக்கங்களை உருவாக்க இணையத்தில் பதிவேற்றப்பட்ட புகைப்படங்களும் காணொளிகளும் மூலங்களாகப் பயன்படுத்தப்படக்கூடிய அபாயமும் உள்ளது.

 

எனவே, இதுபோன்ற ஆபத்தான சூழ்நிலைகளிலிருந்து சிறுவர்களைப் பாதுகாப்பதற்காக, சமூக ஊடகங்களைப் பயன்படுத்தும்போது பெற்றோர்களும் சிறுவர்களின் பராமரிப்பு மற்றும் பாதுகாப்பிற்குப் பொறுப்பான அனைவரும் அதிக விழிப்புணர்வுடனும் பொறுப்புடனும் செயல்படுமாறு இதன் மூலம் அறிவுறுத்தப்படுகிறார்கள்.

 

 

 பாடசாலை நேரம் மாற்ற...